Лазаревски: Кога видовме дека можеме да се носиме со врвни селекции, амбициите ни се повисоки

Милан Лазаревски водеше беспоштедна борба со унгарските пивоти на првиот меч и одлично си ја заврши работата. Македонскиот репрезентативец со нетрпение го очекува денешниот меч со Холандија, свесен дека „лалињата“ играат целосно поинаков ракомет во однос на Унгарците.

„Малку сме со измешани чувства по натпреварот со Унгарија, имавме и тоа каква шанса да го добиеме тој натпревар. Но, не обрнуваме многу внимание сега на тој натпревар. Следи дуел што тотално ќе се разликува од претходниот. Тоа се играчи со сосема поинава антропологија од унгарскиот тим. Играта ќе ни биде поставена на поинаков начин, од корен ќе ни биде променета. Откако видовме дека можеме да се носиме со многу поквалитетни репрезентации, амбициите ни се на повисоко ниво. Победа за нас би била идеалната цел, а мислам дека е и тоа како остварлива во актуелнава ситуација. Не би одвојувал дали повеќе ми одговара Холандија или Унгарија на стилот на игра, треба само предностите што би ги имале против нив да ги модификуваме“, изјави Милан Лазаревски.

Тој јавно искажа благодарност до македонските фанови за издвоеното време и пари да дојдат во Вараждин и да им дадат поддршка на ракометарите.

„Не се сомневам, оваа репрезентација апсолутно поседува квалитет за да им парира на репрезентациите во првото и второто коло. Ги цениме многу македонските навивачи кои одвоиле средства и време за да го поминат овој пат и да ни бидат ветер во грб и додатен мотив. Навистина, улогата што тие ја играат на овие натпревари е енормна и препознатливи се по нивната жестина, темелност и љубов кон овој спорт и тоа како ни се од големо значење на секој натпревар како дополнителна мотивација и да имаме што подобар резултат со нивното присуство“, истакна Лазаревски.