(Фото) ,,Македонците од Пустец го продолжуваат вековниот обичај на осветување на водите”
Македонците од Пустец го осветија Преспанското Езеро на Богојавление
На големиот христијански празник Богојавление – Водици, Македонците од општина Пустец, Република Албанија, традиционално го положија светиот крст во водите на Преспанското Езеро, одбележувајќи го овој значаен верски чин со осветување на водите.
Настанот беше организиран со присуство на голем број верници од Пустец и околните населени места.
“Овој ден нè обединува како Македонци и православни христијани. Осветувањето на Преспанското Езеро е значаен момент за нашата заедница и наша чест е што ја продолжуваме оваа света традиција,” изјави еден од учесниците.
По свечениот обред, верниците останаа во заедничка молитва и дружење, славејќи го празникот во духот на заедништво и верба а најсреќен кој го извади крстот од водите беше Сандре Колевски.
Македонците од Пустец и понатаму ја чуваат својата православна вера и културни традиции, докажувајќи ја нивната силна врска со македонските корени.
За многу години празникот!
Нека денешниот ден донесе мир, благослов и радост за сите православни христијани.
