Кошта: ЕУ и Канада докажаа дека трговските договори се подобри од царините

Докажавме дека трговските договори се подобри од царините, изјави денеска претседателот на Европскиот совет, Антонио Кошта по средбата во Брисел со канадскиот премиер Џастин Трудо, на која присуствуваше и претседателката на Европска комисија, Урсула фон дер Лајен.

Според него Договорот ЕУ-Канада (ЦЕТА) од 2017 година доведе до зголемување на билатералната трговија за 60 отсто.

– Ние сме сигурни и предвидливи пријатели, силни сојузници за мир и безбедност, ја поддржуваме Украина, промовираме зачувување на природата и дигитализација, наведе Кошта.

Лајен истакна дека „трговијата може да биде од корист за сите, како што покажа ЦЕТА“.

Трудо потенцира дека со продлабочувањето на соработката помеѓу Канада и ЕУ се зголемува безбедноста и заштитата на демократијата.

– Светот е сè понепредвидлив, ние остануваме обединети во нашата процена за потребата да се поддржи Украина, вклучително и затоа што тоа е во одбрана на меѓународниот правен поредок, истакна Трудо.

Тој додаде дека ЦЕТА придонела за огромно подобрување на трговските односи.