Голем број настани во општина Аеродром на кои ќе можат да уживаат сите генерации

Оваа сончева сабота е исполнета со голем број настани во Општина Аеродром, на кои можат да уживаат сите генерации.

Денеска во СЦ „Јане Сандански“ се одржува првиот меѓународен и национален таеквондо турнир „АЕРОДРОМ ОПЕН“ на кој се натпреваруваат над 300 учесници од Македонија, Србија, Босна и Херцеговина и Црна Гора.

Македонија досега има постигнато големи успеси во таеквондо и веќе имаме докажани спортисти на светско ниво кои редовно носат медали и победи во нашата земја. Турнирот е во организација на ТК „Те Макс“ со поддршка од Македонската таеквондо федерација и ќе биде дел од новиот лига систем Федерацијата.

В.д. градоначалникот на Општина Аеродром, Дејан Митески, го прогласи турнирот за отворен и им посака успешни борби на сите учесници со надеж дека покрај победите со себе ќе понесат и убави спомени од Општина Аеродром.

Исто така, во ТЦ „Капитол“ денеска и утре ќе бидат изложени креативните изработки на ученици од основните училишта од Аеродром, кои служат за еколошка едукација и кои ни го покажуваат процесот на рециклирање и преработка на отпадот.

„ЕКО-АРТ: Преку уметност до грижа за животната средина“ е настанот на кои се промовираат уметнички дела изработени од отпад, а е во организација на студенсткиот парламент при ФИНКИ и е дел од проектот „Clean AirDrom – нула цврст отпад во Општина Аеродром“.

Главната порака која се испраќа со овој настан е дека со вклучување на сите чинители во општеството, можеме да ја подигнеме свеста за значењето на отпадот, за неговото правилно управување и за зачувувањето на животната средина во која живееме.

Општина Аеродром и во иднина ќе дава безрезервна поддршка на сите вакви активности, со кои преку спорт и забавно-едукативен начин се збогатува секојдневието на аеродромци.