Ристовска и Рапид со гол во последната секунда до осминафинале во ЛШ

Тимот на Рапид Букурешт е последниот што обезбеди место во осминафиналето на Лигата на шампионите, откако успеа да одигра реми на гостувањето во Подгорица кај Будуќност, 21-21.

Екипата каде што игра македонската репрезентативка Сара Ристовска, која играше само на стартот и потоа не влегуваше во игра поради ситна повреда, успеа од негатива од три гола на три минути до крајот да стигне до реми со голот од пенал на Грозав во последната секунда и да обезбеди место во ТОП 12.

Најзаслужна за ремито беше голманката Сандру која запиша 18 одбрани, Полман имаше шест погодоци, додека кај Будуќност премалку беа седумте гола на Вукчевиќ. По комплетирањето на сите натпревари познати се сите двојки за осминафинале и за четвртфиналето на елитната конкуренција.

осминафинале:
Подравка – Брест Бретањ
Сторхамар – Оденсе
Лудвигсбург – Крим
Рапид Букурешт – ЧСМ Букурешт

четвртфинале:
Подравка/Брест Бретањ – Мец
Сторхамар/Оденсе – Ференцварош
Лудвигсбург/Крим – Ѓер
Рапид Букурешт/ЧСМ Букурешт – Есбјерг