Германскиот претседател Штајнмаер е во посета на Чиле
Јужноамериканската турнеја на германскиот претседател Франк-Валтер Штајнмаер денеска продолжува со посета на Чиле, јави ДПА.
Германскиот лидер денеска треба да ја отвори германско-чилеанската економска конференција и да го посети германското училиште во Сантијаго. Дополнително, предвидена е посета на Музејот на меморија и човекови права. Овој музеј е посветен на жртвите на воената диктатура на генералот Аугусто Пиноче, која траеше од 1973 до 1990 година. За време на диктатурата во Чиле беа извршени околу 3.000 политички убиства, а повеќе од 30.000 луѓе беа затворени од политички причини.
Штајнмаер утре треба да се сретне со чилеанскиот претседател Габриел Бориќ.
Во рамките на турнејата, германскиот претседател ги посети и Уругвај и Парагвај.
Франк-Валтер Штајнмаер вчера се сретна со парагвајскиот претседател Сантијаго Пења.
На 1 март, Штајнмаер присуствуваше на инаугурацијата на новиот уругвајски претседател Јаманду Орси.
