Светска банка: Потребни се 11 милијарди долари за обнова на Либан по израелската војна

Трошоците за реконструкција и обнова на Либан од 14-месечната војна меѓу Израел и либанскиот Хезболах се проценети на 11 милијарди долари, соопшти денеска Светската банка.

Во војната загинаа повеќе од 4.000 луѓе, стотици илјади се раселени, а материјалната штета е огромна.

Извештајот на Светска банка проценува дека само за јавно финансирање ќе бидат потребни три до пет милијарди долари, вклучувајќи ги и инфраструктурните сектори.

Околу шест до осум милијарди долари се потребни главно за домување, обнова на трговијата, индустријата и туризмот.

Во извештајот се наведува дека економската цена на конфликтот во Либан е 14 милијарди долари, при што штетата на објектите изнесува 6,8 милијарди долари, а економските загуби од намалената продуктивност, изгубените приходи и оперативните трошоци достигнуваат до 7,2 милијарди долари.

Станбениот сектор беше најтешко погоден со штета проценета на 4,6 милијарди долари.

Светската банка соопшти дека конфликтот предизвикал реалниот бруто домашен производ на Либан да се намали за 7,1 отсто во 2024 година, што е значително назадување од проектираниот раст од 0,9 отсто што би го имал доколку не се случеше војната. (МИА)