Јанев за роденденот на САЕ „Тигар“: Македонијо, биди горда – Додека имаш вакви синови и ќерки кои те чуваат, ќе стоиш исправена

Директорот на Бирото за јавна безбедност Александар Јанев денеска присуствуваше на одбележување на 44 годишнината од формирањето на Специјалната антитерористичка единица „Тигар“.

-Оддаваме признание на една од најелитните сили на нашата земја – единицата Тигри формирана во 1981 година со јасна цел: заштита, сигурност и справување со најсложените безбедносни предизвици. Од обезбедување јавни личности и специјални задачи, до антитероризам и најкомплексни операции, оваа единица со децении е симбол на професионализам, пожртвуваност и беспрекорна подготовка. Низ годините, припадниците на оваа единица го штитат суверенитетот и идентитетот на нашата земја, со несебична посветеност и жртва. Огромна благодарност до нивните семејства, кои стојат зад нив со поддршка и разбирање за оваа тешка, но честита професија, објави Јанев.

Директорот на БЈБ, нагласува дека како менаџмент, остануваат посветени на континуирана поддршка на единицата, усовршување и унапредување.

-Вашата сила и храброст се темелите на безбедноста на нашата земја. Македонијо, биди горда! Додека имаш вакви синови и ќерки кои те чуваат, ќе стоиш исправена!, дециден е Јанев.