Ќе се обезбеди превоз и сместување: Семејствата на пациентите кои се лекуваат во странство нека се јават на ОВОЈ БРОЈ

Службата за општи и заеднички работи при Владата изразува длабоко сочувство до семејствата на настраданите во страотната трагедија во Кочани и изразува поддршка за истрајност и верба за поскоро опоравување на хоспитализираните.

-Ги повикуваме семејствата на жртвите кои се лекуваат во странство и имаат потреба од превоз или сместување, да се обратат на бројот 070270370. Овој број е достапен за сите на кои им е потребна поддршка при организирањето транспорт и сместување во насока на обезбедување бесплатна, брза и ефикасна помош. Во овие тешки моменти за семејствата на настраданите, веруваме дека поддршката од овој тип ќе им биде добредојдена како не би се соочувале со дополнителни трошоци и ресурси, информираат од СОЗР.

Покрај напорите за хуманитарна помош, владината портпаролка Марија Митева информираше дека на утрешната владина седница ќе официјализираат одлука за организирање и обезбедување на сместување на семејствата на повредените, кои во моментов се хоспитализирани во други земји.

-Во овие моменти семејствата не треба да се грижат за логистика или финансиски оптоварувања кога им се најпотребни на нивните најблиски. Затоа владата ќе ја преземе одговорноста за покривање на трошоците за транспорт и сместување, обезбедувајќи семејствата да бидат покрај своите најблиски. За да го олесниме овој процес, позади мене е број за контакт каде ги повикуваме членовите на семејството да ги контактираат за сите потребни детали и координација. Ги повикуваме сите семејства да ја користат оваа линија за да можеме ефикасно да ја организираме поддршката што им е потребна, рече Митева.