Над 140 припадници на АРМ беа вклучени во справување со последиците од пожарот во „Пулс“ во Кочани

Армијата постапувајќи согласно процедурите за ангажирање во мирновремени услови кога не е прогласена кризна состојба и добиеното барање од Центарот за управување со кризи, активно се вклучи во поддршката на државните институции за справување со последиците од пожарот во дискотеката „Пулс“ во Кочани.

-Во координација со кризниот штаб во Кочани, над 140 припадници на Армијата со потребниот број на моторни возила и материјално-технички средства, како и еден воен хеликоптер со обезбедени полетно слетни платформи на повеќе локации во државата, беа ангажирани за поддршка на цивилните институции, информираат од Армија.

Армијата имаше и значајна улога во координацијата на странската медицинска поддршка, односно на воздухопловите, во најголем дел воени, од: Република Бугарија, Република Србија, Република Турција, Романија, Луксембург, Република Австрија, Република Италија, Република Словенија, Република Полска, Република Грција, Кралството Шведска, Република Финска, Република Хрватска и Република Унгарија, а со кои беа транспортирани вкупно 96 повредени лица.

Генералштабот на Армијата останува во постојана комуникација со надлежните институции за понатамошна поддршка.