Трамп ѝ одговори на Кина: Вие сте најголемиот злоупотребувач од сите

Тарифите наметнати од американскиот претседател Доналд Трамп ги погодија светските пазари во понеделникот, откако тој ги предупреди странските влади дека ќе треба да „издвојат многу пари“ за да им ги укине мерките, што тој ги нарече „лек“.

Доналд Трамп повторно се огласи на социјалните мрежи со својата најнова порака за царините. Овој пат ја издвои Кина, која ја опиша како „најголем злоупотребувач од сите“.

„Цените на нафтата се намалени, каматните стапки се намалени (бавниот ФЕД треба да ги намали стапките!), цените на храната се намалени, НЕМА ИНФЛАЦИЈА, а долго време експлоатираните САД заработуваат милијарди долари неделно од земјите што ја експлоатираа преку тарифите кои веќе се во сила. И ова е и покрај фактот што најголемиот злоупотребувач од сите, Кина, чиј пазар е во колапс, штотуку ги зголеми своите царини за 34%, покрај своите и онака апсурдно високи царини (Плус!), игнорирајќи го моето предупредување до земјите кои експлоатираат да не возвраќаат. Доволно направија, со децении, искористувајќи ја старата добра Америка! Нашите поранешни „лидери“ се виновни што го дозволија ова, а и многу друго, да ѝ се случи на нашата земја. ДА ЈА НАПРАВИМЕ АМЕРИКА ПОВТОРНО ГОЛЕМА!“ напиша Трамп.

Последната порака на Трамп е одговор на изјавите кои претходно пристигнаа од Кина.

„Заканите и притисокот не се начин за однесување кон Кина“, рече портпаролот на кинеското Министерство за надворешни работи, опишувајќи ги тарифите на американскиот претседател Доналд Трамп како злоупотреба. Тарифите се „типичен унилатерализам и протекционизам, економска злоупотреба“, рече Лин Џијан за време на редовната прес-конференција. Тој додаде дека американските царини во име на реципроцитет им служат само на САД, а се на штета на другите земји.

Азиските пазари потонаа, европските берзи паднаа на најниско ниво во последните 16 месеци, а падна и цената на нафтата. Инвеститорите и аналитичарите стравуваат дека царините што Трамп ги најави минатата недела може да предизвикаат високи цени и слаба побарувачка, а потенцијално и глобална рецесија.

Откако во понеделникот паднаа берзите во централна Кина и Хонг Конг, кинескиот суверен инвестициски фонд реагираше на стабилизирање на пазарите, пренесува Ројтерс. Министрите на Европската унија, поделени околу тоа колку силно да одговорат на потегот на Трамп без да им наштетат на своите пазари, се состануваат во понеделник во обид да формираат обединет фронт.

Голдман Сакс ја зголеми својата проценка за потенцијална рецесија во следните 12 месеци на 45 проценти, придружувајќи им се на другите инвестициски банки кои ги ревидираа своите прогнози. Економистите во ЏП Морган сега проценуваат дека американската економија ќе се намали за 0,3 отсто поради царините, додека претходно зборуваа за раст на БДП од 1,3 отсто.