Завршна фаза од реконструкцијата на ул. Радушка

Реконструкцијата на улицата „Радушка“ во Ѓорче Петров која сега изгледа модерно и безбедно за сите корисници е во завршна фаза.

Станува збор за поставување ново асфалтно-бетонско покритие на 1.110 од вкупно 2.200 метри од улицата, поточно од гробиштата до ул.„Црногорска“ во вредност од 25 милиони денари (со вклучен ДДВ), средства од Општина Ѓорче Петров.

На оваа улица, досега, изградена е нова фекална и атмосферска канализација, што значително ја подобрува инфраструктурата, направен е нов тротоар од една страна од улицата за поголема безбедност на пешаците, додека онаму каде што немаше осветлување, поставени се нови светла, кои ја зголемуваат безбедноста во вечерните часови.

Во оваа фаза на проектот вложени се значајни средства од Општина Ѓорче Петров, и покрај сите предизвици, резултатите се очигледни – една поинаква, модерна и безбедна улица за сите нас.

Со завршувањето на овие 1.110 метри, целосно ќе се финализира реконструкцијата на улицата. Ова е само дел од напорите за подобрување на инфраструктурата и квалитетот на живот во нашиот град.
Продолжуваме да ги подобруваме состојбите. Работиме напоредно на инфраструктурата, социјалата, образованието, спортот и сите сфери кои се исклучиво од интерес на граѓаните и јавното добро.
Така и ќе продолжиме. Ѓорче дефинитивно се менува, потенцира Александар Стојкоски, градоначалник на Општина Ѓорче Петров.