Политичка недоследност или намерна манипулација? Дали MAEI ја предаде македонската кауза во Албанија?

Само што беше поздравена одлуката на MAEI (Македонска алијанса за европска интеграција) за коалицирање со опозицискиот фронт и конечно ставање крај на политичкото понижување на Македонците во Албанија, партијата направи целосен пресврт – ја смени одлуката за само два дена. Овој неочекуван чекор покрена многу прашања: дали станува збор за политичка недоследност, притисок од власта, или пак за уште една добро режирана манипулација?

Во претходните соопштенија, MAEI отворено ја критикуваше политиката на актуелната власт во Албанија кон Македонците, претставувајќи се како заштитник на нивните права. Но, со последниот пресврт, партијата ја демонстрираше спротивното – од соизвршители во уништувањето на македонскиот идентитет, повторно се обидуваат да се претстават како жртви, како бранители од албанските и бугарските притисоци.

Оваа „политичка акробатика“ не само што ги разочара Македонците од Мала Преспа, туку и остави сериозни сомнежи во однос на вистинските намери на раководството. Дали тие навистина се борат за зачувување на македонскиот идентитет или нивниот единствен мотив е личниот интерес? Сите досегашни чекори покажуваат дека за ова раководство нема ништо поважно од сопствените привилегии, додека македонската заедница во Албанија продолжува да се намалува и да исчезнува.

Бројките говорат сами за себе.
На пописот во 2011 година, во Албанија беа запишани околу 5.000 Македонци. На последниот попис, оваа бројка беше сведена на само 2.000. Ова не е случајност – тоа е резултат на долгогодишна политика на асимилација, во која дел од македонските политички претставници играат активна улога. Наместо да ја бранат својата заедница, тие ѝ помагаат да биде целосно избришана.

Но, историјата ќе им суди. Македонскиот народ нема да заборави кој го продаде неговиот идентитет, кој го издаде неговото право на постоење и кој ја злоупотреби неговата доверба. Ова не е само обична политичка игра – ова е борба за опстанок. Иако раководството на MAEI можеби мисли дека ќе се извлече со вакви манипулации, вистината секогаш излегува на виделина. А кога тоа ќе се случи, ќе биде доцна за поправка на направената штета.