Салах израмни уште еден рекорд

Напаѓачот Мохамед Салах по рекорден седми пат ја освои наградата за најдобар играч во Премиер лигата. Наградата ја заслужи за настапот во месец февруари, во кој беше вклучен во десет од головите на тимот.

Салах постигна шест гола за „црвените“, вклучително и во победата од 2-0 над шампионот Манчестер Сити. Тој забележа и четири асистенции.

Ривали на Салах за наградата беа Бето, Жан-Филип Матета, Јанкуба Минте, Џед Спенс и неговиот соиграч Доминик Шобошлај.

По победата во гласањето, Салах се изедначи со Серхио Агуеро и Хари Кејн на врвот на листата со најмногу награди за играч на месецот. Досега беше изедначен со Стивен Џерард и со Кристијано Роналдо со шест.

Салах беше и играч на месецот во Премиер лигата во ноември 2017, февруари 2018, март 2018, октомври 2021, октомври 2023 и ноември 2024 година.